الموضوع بأختصار ازاى تربى القرموط او سمك السلور او القرموط
سوف اتحدث معكم عن خلاصة تجربة عملية مستمرة منذ سنتين
التجهيز
خزان فيبرجلاس سعة 5000 لتر
هتجيب الخزان وتحط فيه ميه الاول لمدة 3 ايام وبعدين تغسله كويس
هتملاه تانى وتسيبه يومين علشان الكلور اللى فى المية بعدها يكون جاهز لاستقبال الزريعة
هتغير المية كل اسبوعين هترفع ثلثين المياه وتحط مياه جديدة خالية من الكلور
يفضل شراء خزان لونه غامق علشان يقلل الاضاءة فى الداخل لان القرموط يعشق الضلمة
هتجيب الزريعة او اصبعيات القرموط عدد من 200 الى 250 واحدة يعنى لو بالوزن حوالى من 40 الى 50 كيلو
سعر الكيلو من 6 الى 7 حسب المفرخ
هتطلب القرموط النيلى
ودى تتجاب من مفرخ سمكى بالكيلو
افضل حجم يكون عدد 5 حبات قرموط يوزن كيلو جرام يعنى الواحدة 200
علشان التربية متكنش طويلة
التربية من 4 الى 6 شهور حسب نسبة البروتين فى التغذية المقدمة
كل ما زادت نسبة البروتين هيكبر معاك اسرع
درجة الحرارة الامثل للتربية
من 24-32°م ، والأمثل 29°م
ويتحمل حتى 5°م
نصائح للحافظ على درجات الحرارة
عندك ف سخانات الاحواض السمكية تقدر تجيب سخان سراميكى ديجاتال غاطس 150 جنيه او اكثر شوية حسب النوعية ده هيظبط درجة الحرارة للخزان فى الشتا
لو عاوز تبرد الخزان اولا مكان الخزان ميكنش فى الشمس يعنى بالبلدى ميجيش عليه شمس خالص ويكون مكان هاوى
ممكن تلف الخزان بخيش .. شوايل الخيش زى الزير بتاع المية زمان لو اكيد بعضكم شافه شرط انك ترش عليه ميه كل فترة هيقلل درجة الحرارة معاك كتير
اوعا تفكر تحط تلج ولا اى حاجة تسقع المية مرة واحدة لان ده هيعمل صدمة للسمك وهيموت منك
ومتقفلش الخزان ابدا
القرموط بيتنفس فوق المية بيطلع فوق المية ياخد نفسه وينزل تانى يعنى لو قفلت الخزان يبقة هموت السمك
تقدر تقيس درجة حرارة الخزان بالترمومتر اللى زى اللى فى العنبر تربطه بخيط متين وتسقطه فى اعماق مختلفة يعنى لو عامود المية عندك 1م قيس على 30 و 60
وقارن دراجات الحرارة
كل ما عمود المية ارتفع هتقدر المية تحتفظ اكتر بدرجة الحرارة يعنى مش هتتغير الحرارة فيها بسرعة سواء بالارتفاع او الانخفاض
التغذية حاجات كتير :-
بواقى اكل البيت
كسر العيش
مخلفات المطاعم خصوصا مطاعم اللحوم او مطاعم الفول والفلافل
الردة (قشر القمح)
مخلفات المجازر والنافق وهى محببة جدا لهذا الحيوان (تقطع المخلفات او النافق لقطع صغيرة)
بالنسبة لبعض الاعضاء ومنهم عضو اثار موضوع الامراض
فتقريبا مفيش امراض مشتركة بين الطيور والاسماك الا قليل جدا الى يتأثر جدا بهذه الامراض هو البلطى والقاروص والمبروك الفضى ومبروك الحشائش
اما القرموط مناعته عالية جدا ويستطيع العيش فى اقذر الاماكن ولا يتأثر
وقت التغذية هيكون اما الصبح بدرى الساعة 7 تقريبا وممكن وجبة تانية بعد العصر
انت هتحط نسبة 10% من الكمية الكلية لوزن السمك ودى بترجع لمتابعتك طبعا
يعنى لو عندك 100 كليو جرام سمك فى الخزان هتحط اكل 10 كليو تزيد او تقل حسب شهية السمك اللى بتتحدد حسب درجة حرارة المية فى الخزان
لو عايز تعرف الكمية الكلية للوزن فى الخزان "وزن السمك"
هتاخد عية بشبة "ملقاف"
ودة بتعملة حديد وشبك او بتشتريه جاهز 25 جنيه من اى محل ادوات صيد
هتخرج معاك من 5 الى 7 حبات قرموط اوزنهم وشوف الوزن التقريبى لكل واحدة وحسب العدد الموجود اللى حضرتك نزلته فى الخزان هتعرف الكتلة الحية عندك كام تقريبا
ملحوظة مهمة
احذر وانت بتمسك الاقرموط شوكه بيعور متحاولش تمسكه بأيدك فى الخزان او الحوض لان ده نتيجته انك هتتعور اكيد
طيب لو انت متعرفش او ملكش خلق تحسب بسيطة
"كمثال وليس فرض" خد كمية محددة من الاكل بتاعه وليكن 500 جرام وحطها وبعد نص ساعة لو ملقتهاش حط تانى كمية اقل وشوف بعد ربع ساعة خلص زود اقل لان وجود اكل كتير للاسماك هيضر مش هيفيد
حضرتك لو بتقطع نافق او مخلفات مجازر خلى جوانتى ولبس مخصص للتعامل مع الخزان علشان الامراض
فترة التربية بتكون من 4 الى 6 شهور
هيوزن معاك ان شاء الله القرموط الواحد من كيلو الى كيلو وربع
يعنى لو هتجيب 200 قرموط
هتطلع ان شاء الله 200 كيلو
سعر القرموط 9خ للتاجر والقطاعى 13 جنيه بتزيد وقت المواسم زي اعياد اخوانا الاقباط متقلش عن كدا
وقت التسويق كلم تاجر سمك واتفق معاه على السعر وطلع له الكمية اللى هيطلبها علشان متطلعش كل الكمية ويتعب منك فى النقل وترجع بالباقى
لاحظ دايما الجمبر او القرموط اللى بيكبر بسرعة لو لقيت قرموط حجمة ضعف حجم باقى اخواته طلعه افضل ليك
متفضلتش تتفرج وتبص على السمك ولا تتحرك كتير قدام الخزان لان السمك بيشعر بحركات الرجلين وده هيخليه هايج ويلف فى دواير وبكدة انت هتخسر كمية التغذية فى الحركة الكتير ده غير انه لو قلقان مش هياكل
التكلفة الثابتة
تمن الخزان
جوانتى
تجهيز مكان مناسب سواء حديقة منزل او سطح منزل"لو سطح منزل لازم يكون منزل مبنى على اساسات وعمدان علشان حمل المية"
تكلفة متغيرة
تمن الزريعة
التغذية
مخلفات المطاعم سعر الكيلو من 25 قرش الى 50 قرش
تقدر تجيب كميات وتحطها فى الفريزر فى اكياس وتطلع الكيس بالليل يفك التلج لحد الصبح وتحط الاكل
ده بأختصار عن تجربة سنتين ما بين تربية الطيور وتربية القرموط وحاليا تربية الدود"دود الارض" للمساعدة فى تغذية البلطى
لدى عنبرين دواجن تسمين وحوض ترابى لتربية مختلطة قرموط وبلطى
وخزانين لتفريخ القرموط والبلطى "كنت بستخدمهم فى البداية للتربية ولكن بعد نجاح الفكرة طورت الفكرة لعمل الحوض فى الارض الزراعية"
اى سؤال تحت امركم
واى مساعدة وقت التربية برضه تحت امركم
ولو سمحتوا بعض الناس طلبت فى الخاص اوصلهم لاماكن مفارخ الاسماك
انا بفرخ كميات على ادى بربيها بعد كدا فى الحوض فأنت معاك الطريقة دور وابحث عن المفراخ هتلاقى
فى كل محافظة مفرخ سمكى حكومى تقريبا لو مش هيفرخ سمك المهندس هناك بيكون له سكك كتير يقدر يجبلك
اول مرة اجيب انا رحت لدكتور فى كلية زراعة وهو اللى ساعدنى وجابلى الزريعة وتابع معايا لحد الاخر وربنا يكرمه لانه وقف جنبى بدون اى مقابل
اماكن الحصول على زريعة الاسماك الصغيرة
http://goo.gl/o84UzL
الموضوع مربح ان شاء الله محتاج متابعة ودى حضراتكم متعودين عليها من الفراخ والصبر وده برضه اتعودتوا اكيد عليه
1 التعليقات
